Altsasuko gazteen auzia gertuagotik ezagutzeko erakusketa dago ikusgai kultura etxean: Altsasu, eskubidea eta askatasuna jokoan. Altsasu Gurasoak-ek eta Altsasukoak Aske herri plataformak bultzatuta, herriz herri dabilen ekinbidea da. Eta, besteak beste, hamalau argazkiz osaturiko errepaso kronologikoa, irakurketa materiala –dosier juridikoa eta Nafarroako Auzitegiaren autoa, kasurako–, eta bisita liburua aurki daitezke bertan.
Finean, erakusketak modu grafikoan ikusarazi gura du azken urtean gertaturikoa. "Salaketa eta aldarrikapen ekimen gisa, mezua adierazi eta hurrengo hilabeteetarako konpromisoak zabaltzea, handitzea zein batzea bilatzen du ekimenak", diote antolatzaileek.
Zapatuan, manifestazioa
Bestetik, Altsasuko auziagatik protesta egiteko manifestazioa antolatu dute Iruñean. Zapaturako finkatu dute hitzordua, 17:30ean, Golem zinemetatik hasita. Eta bertara joateko autobusa antolatu dute ibarrean; Oñatiren kasuan, Arrano tabernan eman daiteke izena.
