Euskal Herrian tortura "sistematikoa" izan dela salatzeko elkarretaratzea egin dute Oñatin

Jokin Bereziartua Lizarazu 2018ko ots. 14a, 11:09

Atzo duela 37 urte Joxe Arregi euskal herritarra polizia-etxean torturak jasan ostean hilik agertu zenetik, otsailaren 13a tortura salatzeko eguna da Euskal Herrian. 1995ean atxilotua eta torturatua izan zen Jose Mari Zugasti oñatiarraren arabera, Euskal Herrian "sistematikoa" izan da tortura: "Halako bizipen batekin bizitzen ikasi daiteke, baina ez da gainditzen".

Euskal Memoria fundazioaren arabera, 1960. urtetik 5.657 kasu izan dira Euskal Autonomi Erkidegoan eta Paco Etxebarria auzitegi medikuak eta haren lantaldeak egindako ikerketak 3.400 pertsonek jasandako lau milatik gora ebidentzia jarri zituen mahai gainean Tortura: 1960-2014 izeneko ikerketaren behin betiko txostenean. Debagoienean 162 tortura salaketa izan dira, horietatik 60 Oñatin, eta elkarretaratzea egin zuten atzo Foruen Plazan. "Tortura salatzeaz gain, torturatuendako justizia eta erreparazioa eta bizi izan duguna ez errepikatzea eskatzen dugu", dio 1995ean atxilotua eta torturatua izan zen Jose Mari Zugastik.

Pozik Estrasburgoko epaiarekin

Aste honetan bertan Estrasburgoko Giza Eskubideen Auzitegiak 2008an Arrasaten atxilotu zituzten ETAko kide Igor Portu eta Mattin Sarasolari tratu txarrak emateagatik Espainia zigortu izana positiboki baloratzen du Zugastik: "Aho batez esan dute tratu txarrak jaso zituztela eta hiru epailek tortura hitza aipatzen dute. Positiboki baloratzen dugu".

Horrekin guztiarekin Euskal Herriko gatazka politikoaren kontakizun osoa idatzi behar dela uste du 1995ean atxilotua eta torturatua izan zen Zugastik. Salbuespen egoera mantentzen den bitartean tortura arriskua hor egongo dela dio. Halako bizipen bat gainditzen ez dela ere gaineratu du. "Han bizi izandakoa ez da gainditzen, egunero daukat presente. Horrekin bizitzen ikasten da".

 

 

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak