Floren Aoiz: "Nafarroakoa ez da kolore aldaketa huts bat izan, erregimen oso bat desmuntatzen ari da"

Oñatiko Antixena gaztetxeak gonbidatuta, Iratzar fundazioko zuzendari Floren Aoiz Nafarroako gakoez aritu zen atzo eta, besteak beste, nabarmendu zuen aldaketa ez dela bakarrik instituzioetan eman. Nafarroako gaiekin jarraituz, Pruden Gartzia historialari oñatiarrak Nafarroako Auziaz izeneko liburua aurkeztuko du bihar, egubakoitza, gaztetxean bertan.

Sorturen Iratzar fundazioko zuzendari Floren Aoizek uste du Nafarroako aldaketaren gaineko gogoeta Euskal Herri osorako balio dezakeen hausnarketa dela. Ezker abertzaleko kide ezagunak azpimarratu zuenez, Nafarroako aldaketa 2015eko hauteskundeak baino lehenago hasi zen mamitzen eta ez da soilik maila instituzionalean eman: "Bai herri mugimenduetan, bai ideien arteko borroka esparruetan eta beste esparru kulturaletan ere aldaketarako grina nahikoa indartsua da. Baina aintzat hartu behar da aldaketaren kontrako indarrak ere han daudela; lehenbiziko shock-a gaindituta, kontraeraso indartsu bat egiten ari dira. Begi bistakoa da aldaketaren gobernuek eta udalek egiten duten edozein saioren aurrean erasokor daudela. Nafarroako aldaketa ez da gobernu edo kolore edo aldaketa hutsa izan, erregimen oso bat desmuntatzen ari da", azaldu zuen, besteak beste.  

30 bat lagun gerturatu ziren Antixena gaztetxera Floren Aoizen gogoetak entzuteko.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.