Txikitik eragiten, herritarrekin batera, giro onean ari dira ospatzen Argia Eguna

Goizean herritar dezentek egin dute Gerardo Elortzak gidatutako kultur ibilbidea eta eguerdian herritar ugari izan dira hainbat arlotako (euskalgintza, feminismoa, ekonomia soziala, nekazaritza, ingurumenaren defentsa…) hogei bat elkartek izan dituzten erakustokiak ikusten. Gainera, berrituta etorriko da Argia astekaria azaroan eta zero zenbakia ezagutzeko aukera ere izan da.

Iaz berreskuratu zuten Argia Eguna eta aurten Oñatin ari dira ospatzen Donostialdearen ostean harpidedun gehien dituen eskualdea delako Debagoiena. Ekintzaz beteriko asteburua antolatu dute Oñatin, Argia Eguna dela-eta, eta zapatua indartsu hasi dute. Goizean, Gerardo Elorzak gidatutako bi ordutako ibilbidea egin dute herritar dezentek eta ibilbide hori girotzen izan dira bertso eskolako hiru lagun: Egoitz Aizpuru eta Maider eta Urko Arregi anai-arrebak.

Eragileen azoka

Eguerdian, berriz, hainbat eragilen azoka izan da pilotalekuan eta jende ugari bertaratu da. Hogei elkarte inguruk euren erakusleihoa jarri dute eta tartean izan dira, Oñatiko Ortuzabala kontsumo taldekoak, Erein Da Janekoak, Fiare Banku Etikoa babesten dutenak, Euskal Memoriaren Fundaziokoak, Bagarakoak, Txatxilipurdikoak, Eltziakoak, Txirrinka Oñatiko Bizikletazaleen Elkartekoak... 

Argiako kazetari Unai Break adierazi du oso garrantzitsua dela eurendako eragileen azokak Argia Egunean presentzia izatea: "Hori da gure astekarian eta webgunean daukagun filosofia: mundua aldatzen ari direnekin harremanetan egotea, euren ekimenen berri emateko eta txikitik eragiten jarraitzeko".

Argia berritua

Azarotik aurrera diseinu berria izango du, gainera, Argia astekariak eta zero zenbakia ikusteko aukera ere izan da. Bertaratu diren eragileetako ordezkariekin eta herritarrekin Argiakoek euren iritziak jaso ahal izan dituzte zuzenean.

Harpidedunen garrantzia

Harpidetza bakoitzarekin, are independenteago lelopean, herritarrei babesa ere eskatu diete "kazetaritza zintzoa, loturetatik kanpokoa eta askea" egin dezaten.

Erlazionatuak

Argia Eguna, Oñatin

Oñati

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.