Umeen danborradarik ez da egongo aurtengo San Migel jaietan

Hainbat deialdi egin eta gero, guraso bakarrak agertu du antolakuntza batzordean parte hartzeko prestutasuna. Martitzen iluntzean egin zuten azken batzarra Udalak eta Musika Eskolak eta gurasoen laguntzarik ez dagoenez, danborradarik ez da egongo. Inork taldea batu eta laguntzeko prest balego, irail hasieran jo beharko du beranduenez Udalera. Laguntza osoa eskaintzeko gertu dago Udala.

Orain arteko antolakuntza batzordeak, 30 urtez jardun eta gero, azkena izango zela; laga egingo zutela, alegia. Horren aurrean Udaleko kultura sailak hainbat saiakera egin ditu batzorde berria osatzen ahalegintzeko. Zehazki,  hiru deialdi egin dira eta udaletxetik bertatik azaltzen dutenez, guraso bakarrak agertu du interesa. Gutunak eta guzti bidali zitzaizkien gurasoei, ikastetxeen bitartez, parte hartzera animatzeko baina ahalegin horrek ere ez zuen erantzunik izan. Atzo iluntzean egin zen azken bilera eta guraso bakar horrek soilik agertu du prestutasuna. Gaur, hortaz, egoera da aurtengo San Migel jaietan ez dela haurren danborradarik egongo. 

Udalak, ordea, ez du guztiz amore eman eta azken aukera bat ireki du talde bat batu eta antolakuntzan parte hartzera animatuko balitz. Hala izatekotan, talde hori iraileko lehen egunetan, beranduenez, jarri beharko litzateke harremanetan Udalarekin. 

Udala laguntza eman eta, beharrezkoa izanez gero, aldaketak onartzeko prest legoke. Esate baterako, data. Irailerako hirugarren asteburuan izan beharrean, denboraren larritasuna ikusita, aukera moduan ikusten da hurrengo astera atzeratzea eta "eredu eta proposamen berriak onartzeko arazorik ez" dela egongo azaldu dute Udaletik.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.