Oñatiko EH Bilduko zerrendako kideak elkartu ziren San Lorentzoko plazatxoan hainbat herritar inguruan zituztela. Mikel Biain alkategaiak hurrengo egunetan dituzten hitzorduak gogorarazi zizkien elkartutakoei. Batetik datorren domekan, maiatzak 17, Donostian egingo duten Gipuzkoako ekitaldi nagusira gonbidatu zituen. Autobusa bete gura dute Oñatitik eta izena eman daiteke Arrano eta Ona tabernetan.
Bestetik, maiatzaren 22an, egingo dutela hauteskunde kanpainako ekitaldi nagusia Oñatin jakinarazi zien; Foruen plazan izango da, 19:00etan, eta hori betetzea garrantzitsua dela gogorarazi zien Biainek.
Hitzordu garrantzitsuena, baina, maiatzaren 24koa dela azpimarratu zien. "Aurrera egiten" joateko hautatu beharreko hitzordua delako hori, eta era berean, azken lau urteotan "emandako konfiantza" berresteko eguna.
Andoni Goitia eta Urko Egaña bertsolari oñatiarrek girotu zuten ekitaldia, eta horiek ere hauteskunde kontuak izan zituzten kanturako gai.
