Udal eta Foru hauteskundeak 2015

Oñatin ere herritarren ekarpenak jasotzeko ekimena abiarazi du EAJk

EAJk Oñatin ere iragarri du udal hauteskundeetara begira herritarren ekarpenak jaso eta horiek programan txertatzeko parte-hartze ekimena. Ekimenaren azalpenarekin esku-orriak banatuko dituzte oñatiar guztien postontzietan, ekarpenak idazteko papertxoarekin eta gutun-azalarekin batera. Ekarpena egin gura duenak papertxoan jaso eta gutun-azalean ohiko postaz bidali baino ez du.

Horrez gain, Facebook eta Twitter sare sozialen bidez ere egin ahal izango dira ekarpenak, baita e-postaz (eajonati@gmail.com) ere. Miren Elgarresta alkategai jeltzaleak animatu ditu oñatiarrak bakoitzak bere eguneroko bizitzako esperientziatik antzematen dituen beharren berri ematera.

Ekimen honekin batera, Elgarrestak iragarri du herriko askotariko esparruetako eragileekin ere ari direla biltzen azkenaldian, eta haiengandik ere jasotzen ari direla programarako proposamenak.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.