Erabilerari dagokionez, gazteek bertan egoteko erabiltzen dituzte eta herriko beste eragileekin harremana duten edo ez galdetuta, gehienek baietz erantzun dute, eta esan dute, batez ere, gaztetxearekin dutela harremana. Gabonetan hainbat lokaletan izan dira informazioa jasotzen, eta eguaztenean gazteekin batera egindako bilerarekin, hasiera eman zioten herriko gazte lokalen azterketako lehen faseari.
Datorren eguaztenean bizilagunekin egingo dute bilera eta hilaren 28an, guraso eta lokalen jabeekin. Bigarren fasean, otsailean hasiko dira bigarren fasearekin eta orduan gazteak, bizilagunak eta lokal jabeak batera bilduko dira eta adostasunetara iristen saiatuko dira.
Nerea Zubia zinegotziak azaldu duen moduan, helburua da lokalen azterketa egitea eta protokolo bat zehaztea elkarbizitza eta lokalen segurtasuna bermatuko dituena. "Ez da dekalogo hutsa izango, udaleko sail ezberdinen lana eta funtzioak ere zehaztu behar dira. Kalkulatzen dugu Aste Santu osterako egongo dela gertu", dio Zubiak.
