Udaleko osoko bilkuren aretoan egin dute gaur eguerdian aisialdirako ortuen zozketa. Ekimena martxan jarri zenean 150 eskari jaso ziren arren, azkenean 66 herritar izan dira 74 lursailetarako zozketan sartu direnak. "Hasiera baten izena ematea erraza ikusten da, baina gero, behin baratza eta horrek dakarren lana ikusita, batzuk atzera bota dira. Baina balorazioa ona: aurreikusitako ia lursail guztiak bete dira, eta uste dugu aurrera jarraitu dutenek gogoz hartuko dituztela", azaldu du zozketaren ostean Aitor Gerenabarrenak, Oñatiko udaleko Nekazaritza eta Ingurumen teknikariak. Hala, gaur zozketatu dena izan da herritar bakoitzaren lursaila zein izango den. Zozketaren emaitza, HEMEN.
Gerenabarrenak azaldutakoaren arabera, libre geratzen diren lursailak, Udalaren esku geratuko dira: "Araudian jasotzen zen lursailen %10 Udalarentzat izateko aukera, eta azkenean, nahi barik, hori gertatu da. Erabiketzeke dago lursail horiekin zer egin: kolektibo bereziendako izan daitezke, eskolekin erabiltzeko...".
Eguenean, bilera
Behin lursailak zozkatuta, erabiltzaile izango direnekin harremanetan jarri eta eguen honetan bertan bilera egingo dute. "Udalaren plangintza azalduko dugu, eta azalduko ditugu baita ere elkartea sortzeko eman beharreko urratsak eta dauden estatutu motak", iragarri du Gerenabarrenak. 18:30ean izango da bilera, Kultur Etxean.
Formakuntza saioak ere egingo dituzte: "Seguruenik urtarrilean izango dira. Lehenengo, saio teoriko batzuk egingo ditugu eta udaberrira begira, baratza lantzen hastearekin batera, saio praktikoa egingo dugu. Hori izango da irteteko pistola-tiroa", dio Nekazaritza eta Ingurumen teknikariak.
Egokitze lanak, bukatzeke
Oraindik ere ez dituzte amaitu aisialdirako ortuen eremuan egin beharreko lan guztiak. Txabolak, esaterako, urte amaierarako bukatuta egotea aurreikusten dute: "Muntatuta daude. Gertatzen dena da txabola denak teilatupe berean egongo direla, eta teilatua oraindik ere bukatzeke dago".
Bestelako lan batzuk ere geratzen dira eremua guztiz bukatzeko, baina horiek 2015ean egingo dituzte.
