Jaietako bigarren asteburua ospatzen dabiltza Oñatin. Atzo hainbat ekitaldi izan ziren. Besteak beste, Karrikaldia txosnagunean. Asko eta asko, baina, gaurko egunerako erreserbatu dira. Izan ere, gaurkoa da askorentzat egun ederrena.
Kaleak jendez lepo zeuden gaur eguerdirako. Baserritar jantzia soinean, egun osoko festaz disfrutatzera irten dira herritarrak. Hala, jende asko zebilen abereak ikusten, adibidez. Herriko baserritarrek behiak, behorrak, astoak, ardiak, txerriak... jaitsi dituzte kalera. Baina ikustekoaz gain, bazen zer erosi ere fruitu eta barazki azokan eta artisauenean. Lehenengoan, tomateak, piperrak, pikuak, urrak... zeuden; eta bigarrenean, eskuz eginiko produktu ugari: belarritakoak, poltsak, kamisetak, ukenduak... Bestalde, Herri Egunean ezin dute hutsik egin taloak eta sagardoak. Horrela, luzea zen taloa erosteko lerroa eta Foruen plaza lepo zen 12:00ak bueltan 21 sagardo etxek ekarritako sagardoa dastatzeko.
Goiz guztia kalean egin ostean, asko herri bazkarira joan dira. Giro bikaina izan dute, herriko musikariek alaitua. Indarrak hartu ostean, eguna goizaldera arte luzatzeko asmoa izango dute askok. Izan ere, oraindik bada non disfrutatu: herri kirolak, Erdizka Lauetan, Gozategi txosnagunean...
---------------------------------------------------------------------------------------------------------------------
Honakoak izan dira fruitu, barazki eta gazta lehiaketetako irabazleak:
Fruituetan:
Lote ederrena: Felix Azkargorta
1. saria: Felix Azkargorta
2. saria: Joxe Mari Lizarralde
3. saria: Xabi Campo
Barazkitan:
Lote ederrena: Xabi Campo
1. saria: Xabi Campo
2. saria: Arantzazu Sagarzazu
3. saria: Joxe Mari Lizarralde
Gaztak:
1. saria: Nestor Altzelai
2. saria: Gomiztegi
3. saria: Akaitz