Abuztuaren erdiaz geroztik, Azkoagain ez dago hutsik. Hasita daude futbol taldeko kideak entrenatzen eta behin iluntzerako, talde bateko zein besteko jokalariak entrenatzen dihardute egunero. Lehen taldeak, esaterako, astean lau entrenamendu egiten ditu.
Jabi Azpiazurekin batera, Jesus Mª Zelaia ari da talde guztien entrenamenduak koordinatzen. "Larrañako futbol zelaia ere hor dago. Argia badago han, baina aldagelak falta dira oraindik. Ari da osatzen hori ere. Asmoa da zelai biak erabiltzea", adierazi du Azpiazuk.
Igor Serrano
Lehen taldea, esaterako, uztailean hasi zen entrenamenduekin, lasai. Eta hamabost eguneko oporren ostean, hilaren 18an hasi zen denboraldi berria ganoraz prestatzen. Aurten, Igor Serrano eta Unai Mendia goierritarren aginduetara jokatuko dute.
Klubak helburu bat jarri dion arren, bere helburu pertsonala denboraldiko lehen partidua irabaztea dela dio Serranok. Aloña Mendi talde berria da Igor Serranorendako, baina gogoz eta pozik dago Idiazabalgo entrenatzailea."Klubeko zuzendaritza taldearekin harreman ona dut eta jokalariekin ere bai. Pozik nago. Ikusi dut lanerako gogoz daudela", esan du Serranok.
Irailaren bigarren asteburuan hasiko du denboraldia Aloña Mendiko lehen mailako futbol taldeak, eta etxean jokatuko du, Martuteneren kontra. Egubakoitzean, baina, lagunarteko partidua jokatuko du Bakion.
