Imanol Artolak, Oñatiko basozainak, inguruetako mendietan jasotako egur eta bestelako elementuekin egindako eskulturak daude ikusgai Egurra eta Natura izeneko erakusketan. Atzo hasi eta martxoaren 2ra arte Oñatiko kultur etxeko erakusketa aretoan egongo da ikusgai 18:00ak 20:00ak bitartean. Atzoko aurkezpenari baina, kutxu berezia eman nahi izan zioten natur eskolakoek, eta horretarako, Andoni Salamero Zumarragako poetari gonbitea luzatu zioten.
Salamerok, erakusketan zehar bidai bat egitea proposatu zien ikusleei; poesia eta kantuen bidez, egurrari eta naturari bizitza emanez. Ikusleek arretaz entzun zituzten poetak kontatu eta kantatutakoak. Eta abesteko unea heldu zenean ere, nor edo nork lagundu zuen, besteak beste Gure Bazterrak edo Txoria Txori abesten. Jon Betanzos, Oñatiko Natur eskolako kidearen arabera, ikusteko eta gozatzeko erakusketa da. Bitxikerien artean, zazpigarren mendeko haritz zati batekin egindako eskultura bat dago.