Aitor Orueta entrenatzailea gustura zegoen jokalariek izandako jarrerarekin, ez ordea egindako jokoarekin. "Baloiak galdu ditugu galdu ezin diren tokian, gure zelaian", azaldu du partidu amaieran. "Aldageletan esan diet futbolean jokatzen dela baloiarekin, eta baloiaren jabetza ez baldin badugu jai daukagula", gaineratu du Oruetak.
Bigarren zatian indarberrituta atera dira etxeko jokalariak eta buelta eman die lehiari.
Zelai erdia indartu dute
Aldagelatik bueltan joko sistema aldatu egin du Aloñak. Erdian hiru jokalari jarri ditu Oruetak. Aldaketak eragina izan du jokoan. Hala, hurrengo 25 minutuak oso onak izan dira. Etxeko jokalariak ondo kokatu dira zelaian eta baloia ondo mugitu dute zelaiaren alde batetik bestera. Bi faktore horiek kontuan hartuta, lehia berdintzeko gauza dira oñatiarrak.
Etxekoen lehenengo gola Julen Palaciosek egin du; area kanpotik boleaz errematatu du baloia eta gol polita sartu du Palaciosek.
Behin gola jasota, baina, etxekoak lasaitu egin dira eta berriro ere lehenengo zatiko jokoa egiten hasi dira. Baloi asko galdu dituzte eta aurkariei konfiantza eman die kontraerasoak egiteko. Hala ere, zumaiarrak ez dira gauza izan gol aukera garbirik sortzeko.
88. minutuan bigarren gola
Aloñak kontraeraso baten sartu du bigarren gola; Anderrek pase bikaina egin dio Moiuari eta honek baloia sareetan sartu du. Hala, hiru puntuak eta lasaitasuna lortu dituzte oñatiarrek Azkoagainen.