"Leintz Gatzagako Udalak bertako ekoizle batekin eta Gatzagako gatzarekin produktu bat sortzeko nahia izanda, txokolate dultzea eta gatz gazia batuta txokolateko-tabletak egitea adostu dugu. Probak egin ditugu, eta, azken emaitza gustukoa izanda, proiektuarekin hasiko gara", adierazi du Ainara Abasolok, Irrika Gluten Free Bakeryko arduradunak.
Proiektuak hainbat helburu dituela gaineratu du Dorleta Elkorobarrutiak, Leintz Gatzagako alkateak: "Gluten bako produktua izango da, jende guztiarentzat eskuragarri izango dena, gatzaren onurak zabalduko ditugu, zero kilometroko produktua… Ainararen aita gatzagarra izanda bada lotura bat, gainera, Irrikaren eta Gatzagaren artean".
