Turismoa sustatzeko webgunea hiru atal nagusiz osatuta dago: Gatz Museoa, herria eta ingurumena eta laugarren bat, proposamenena dela. Informazio osatuaz batera, ikus-entzunezko irudi ikusgarriekin lagunduta dago, baita argazki ederrekin ere.
Hiru ardatz nagusi: gatza, ingurumena eta herria
"Ardatz nagusiak argi ezarri ditugu eta logo berriak hala adierazten du: gatza guretzat ezinbestekoa da, nortasuna ematen diguna; ingurumena da bigarrena; Gatzagako basoak publikoak dira gureak, sekulako ibilbidearekin, eta, hirugarrena herri gotortua, herria bera; harresia, herria, eta, bere historia", adierazi du Dorleta Elkorobarrutiak, Leintz Gatzagako alkateak.
Abao Komunikazio Agentziak egin du webgunea, eta, guztiz amaitzeko azken ukituak falta diren arren, asteon bistaratu dute turismo webgunea.
Ikus-entzunezkoen garrantzia
Oraingoz, gainera, ikus-entzunezko bat ezarri dute Gatz Museoaren ekoizpenaren baitan, eta, bigarren bat ari dira grabatzen. "Bata, gatzaren ekoizpena erakusteko ikus-entzunezkoa da, eta gatzaren ekoizpenaren atalean txertatu dugu webgunean. Orain, bigarrena ari gara grabatzen, eta grabaketa finala urriak 14ko astean egingo dugu", azaldu du Dorleta Elkorobarrutiak, Leintz Gatzagako alkateak.
Bigarren ikus-entzunezkoan ingurumena islatu nahi dute, eta, mendi inguruetan egin dituzte zenbait grabaketa. Hala ere, Gatz Museoa eta herria bera grabatu nahi dituzte dron batekin. Aurreikuspenen arabera, Urriaren 14ko astean egingo dute honako grabaketa.
