"Zentzuzkoena da gatz museoa ixtea. Izan ere, bakarrik gatzagarrak etorri daitezke bisitetara, eta printzipioz hartu dugun erabakia, hamabost egunez ixtea izan da", adierazi du Jon Errasti Leintz Gatzagako museoko arduradunetako batek.
Herritarrentzat salbuespena
Museoa itxi arren, bertakoentzat eskainiko dutela zerbitzua adierazi du Errastik. "Museoa itxita egon arren, hamabost egun hauetan museoa bisitatzeko nahia duen gatzagarrak museora deitu dezake. Hala, gehienez bost pertsonendako bisita eskainiko diegu…".
Gatz produkzioan eta salmentan indarrak
"Bi diru sarrera ditugu; museoa eta gatzaren salmenta. Beraz, indar eta esfortzu guztiak gatzaren salmentan zentratu beharko ditugu". Horren harira, domeka honetan, Arrieta herrian, Bizkaian, azoka batean egongo dira gatz salmenta egiten.
Momentuz, gatz gehiago ekoiztea ez dute aurreikusita, stock-a badutelako. Hala ere, beharra izanez gero, gatza produzituko dutela ere gaineratu gura izan du Errastik.