"Onartu dugun aurrekontutik 60.000 euro bueltatu beharko ditugu, eta, gastu arruntak kenduta, diru gutxi geratuko zaigu inbertsioetarako. %20 bueltatu beharko dugu, printzipioz, baina guk %25eko murrizketa egin dugu, aurrera begira etorri daitezkeenak kontuan izanda. Beraz, Foru Aldunditik 179.897 euro jasotzea aurreikusten dugu. Gatz Museoan, ekoizpena handitzeko proiekturako eta harrera egokitzeko 30.000 euro bideratuko ditugu; Gaztainuzketa mendietxeetako Basoaz blai proiekturako, berriz, 35.000 euro. Horiek izango dira inbertsio nagusiak. Hala ere, errepide aldera ematen duen frontoiko pareta apaindu nahiko genuke, 5.000 eta 10.000 euro inguruko inbertsioa eginda", adierazi zuen Eugenio Otsoa alkateak.
Horiekin batera, udaletxeko instalazioetarako diru zati txiki bat erabiliko dutela ere gaineratu du Otsoak, eta gainontzekoa auzolanean egitea dela beraien asmoa adierazi.
Energia Mahairako hautaketa
Aurrekontuez gain, Debagoieneko Mankomunitateko Energia Mahairako Aitor Larrañaga teknikaria eta Eugenio Otsoa izendatu dituzte.