Udal hauteskundeak domekan egingo dira Gatzagan

Espainiako Gorteetarako hauteskundeetatik astebete igarota, domekan, egingo dituzte udal hauteskundeak Leintz Gatzagan. Gatzagako Hautesle Elkartea da aukera bakarra, eta honako hauek dira Udala gobernatzeko hautagaiak: Eugenio Otsoa, Juanito Bengoa, Jon Sasiain, Beñat Agirreurreta eta Garazi Orobengoa.

Taldea osatzeko lana luzea eta gogorra izan den arren, pozik eta gogotsu agertu dira hautagaiak, lanerako prest. "Orain, bi gazte etorri dira, eta azpimarragarriena hori dela uste dut. Izan ere, gazteak erakartzea zaila da, eta gure kasuan, taldea osatzea ere zaila izan zaigu. Hala, etorkizunera begira, beste gazte batzuk animatu eta esperientzia faltaren beldur hori kentzeko baliagarria izango da", adierazi du Juanito Bengoa Gatzagako jarduneko alkateak.

Zerrendako ordena zehaztu gabe

Zerrendako ordena eta alkategaia, baina, erabaki gabe dituzte oraindik. Eta, hori zehazteko, eta beste zenbait gairen bueltan hitz egiteko batu ziren, atzo, Herriko Hautesle Elkarteko kideak.

Duela sei hilabete ez zuten udal hauteskunderik egin Gatzagan, ez baitzen Udal Gobernurako herritarrek osatutako zerrendarik aurkeztu. Inoiz gertatu bako egoera izan zen hura, herrian beste urte batzuetan aurkeztu izan baita herritarrez osatutako hautesle elkarte bat Udalean aritzeko. 

Abenduaren 7ra arte lasai

Udal hauteskundeetara aurkeztu den talde bakarra izanik, ez dago zalantzarik aurrera aterako direla, nahiz-eta boto kopuru minimo bat behar duten. Hala ere, ez dute ospakizunik egingo domekan, behintzat. "Ez dugu osapkizunik izango domekan. Ea emaitzak nola irteten diren, eta ondoren, kargu-hartzea egiten dugunean izango dugu ospakizuna… Hala ere, boto kopuru minimo bat behar dugu, baina oso bitxia izango litzake taldea ez irtetea…".

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.