Pozik dira Atxorrotx Elkarteko kideak egunak emandakoarekin. Goiz eta eguerdi partean giro polita izan zen plazan. Umeendako bi puzgarri egon ziren eguerdira arte, eta herriko talogileek eta trikitilariek berezi egin zuten eguna.
Talogileak pozik ziren saldutako talo kopuruarekin. Eguerdi aldean izan zuten eskaera kolperik handiena. Eguraldia lagun zen plazan eta jendea gustura egon zen. Talogileek kalkulatzen dute 200 bat talo saldu zituztela. Txistorra izan zen eskaera handieneko jakia, baina amaierarako txistorra bakarrik zuten eskaintzeko; izan ere, gainerako jakiak agortu egin ziren.
Ehun bat lagun bazkaltzeko
Ez ziren kopuru horretara iritsi baina gertu ibili dira. Eguraldi iragarpena ez zen aldekoa eta aterpean jarri zuten mahaia. 15:30erako I love paella etxeko Agus Serres-ek prest zuen valentziar erara egindako paella.
18:30ean buruhandiak izan zituzten Eskoriatzan eta 19:00etan hasita Txoriburu eta Sermond taldeen kontzertuak.
Egunak emandakoaren inguruko balorazio positiboa egin du Atxorrotx Kultura Elkarteko kide Iñaki Kortazarrek.
