Haurrekin egoteko espazio seguru eta itxi baten beharrak bultzatuta sortu dute Eskoriatzan TipiTapa guraso elkartea. Maite Santamariari eta Maitane Ayalari otu zitzaien ideia, iazko ikasturtean Aretxabaletako Kukumiku elkarteko kide eta ekintza arduradun izan ostean.
Santamaria eta Ayala maiatzean hasi ziren elkartea eratzeko prozesuarekin. Udalarekin harremanetan jarri ziren eta oniritzia jaso zuten Udalaren aldetik. Ludoteka zerbitzua eskaintzen duten espazioa izango da aurrerantzean Tipitapa elkartearen gunea, hau da, lokala partekatuko dute.
Bazkide egiteak lokala erabiltzeko eskubidea emango die familiei; gaur gaurkoz, lokalaren garbiketa udalaren ardura izango da. Urtean zehar irten daitezkeen borondatezko lanak izango dira bazkideen ardurapekoak.