Eskoriatzako herritar batek positibo eman ostean, zalaparta sortu da herrian. Hala ere, lasaitasun mezua helarazi gura izan dute udaletik: "Osakidetzatik atzo baieztatutako positibo bakarra dugula herrian dakigu oraingoz, soilik. Hala ere, lasaitasun mezua helarazi gura dugu, eta, eboluzioa ikusi. Serio hartu behar dugu guztiok eta herritarron ardura ezinbestekoa da. Osasun Sailak ematen digun argibideen arabera jokatuko dugu, baina, esan moduan, norberaren ardura da garrantzitsua; segurtasun neurriak mantentzea, eskuak garbitzea, maskarilla…", adierazi du Josu Ezkurdia udal ordezkariak.
Hotela taberna ixtea erabaki dute bertako jabeek: "Positibo eman duen herritarrarekin kontaktu zuzena izan dugu, eta, beraz, guri ere proba egin digute; niri eta bikotekideari. Gaur jakinarazi didate nik ere positibo eman dudala, eta nire bikotekidea emaitzaren zain dago. Orain arte desinfektazio eta segurtasun neurri guztiak hartu ditugun moduan, zuhurtziaz jokatzea erabaki dugu, eta, horregatik, taberna itxi egin dugu. Hamaika egunez izango dugu itxita. Hala ere, zuzeneko kontaktua izan duten herritarrak eta maskararik gabe egon diren pertsonak bakarrik arduratu behar dira…", adierazi du Hoteleko jabeak.
Bihar ez da udalekurik egongo
Herritarren artean sortutako kezkak udalekuen martxan ere eragina izan du. "Gaur, udalekuak egin dira, baina, guraso asko arduratuta zeudenez, haurrak etxera eramatea erabaki dute; beste batzuk etxera bidali ditugu geuk. Hala ere, zenbait haur geratu dira begiraleekin…", adierazi du Maider Etxaniz gazteria teknikariak. Bihar, egubakoitza, udalekuak bertan behera geratuko direla adierazi dute, prebentzio gisa.
Inkernu taberna bigarren fasera
Inkernu tabernan, bestalde, bigarren fasera bueltatzea erabaki dute. Hala, taberna barruan ezingo da kontsumitu, bakarrik kontsumizioa eskatu, eta terrazan jarrita hartu beharko da. Gainera, kontsumizioa eskatzerakoan bezeroak maskara jarrita eraman beharko duela adierazi dute Inkernu tabernakoek.
Compostela ere itxita
"Domekan hemen egon zen koronabirus proban positibo eman duen herritarra. Beraz, kontaktu zuzen moduan hartuta, taberna itxi eta etxera joango gara gaur, PCR proba egin arte…", adierazi du Usune Bengoa Compostelako jabeak.
EH Bilduren mezua
Eskoriatzako EH Bildutik ere "prebentzioz" jokatzeko eskatu dute: "Bilakaera jakin arte gogoratu lasaitasunez eta arduraz jokatzea, neurri sanitarioak ondo gordetzea (maskara erabili kalean baita, distantziak gorde, eskuak maiz garbitu eta gure burua ondo babestu) eta Osakidetzaren protokoloak jarraitzea. Osakidetzako Aholku Sanitarioa: 900 20 30 50".
