Labidean eskaintzen duten zerbitzua 2019ko maiatzean jarri zen martxan, eta duela gutxi ireki zuten webgunea honen berri emateko. Mendiko sei bizikleta aukeran, jendeak interesa duela adierazi du Inazio Gabilondo Gatzebike zerbitzuko arduradunak: "Batez ere, udan izan genuen arrakasta handiena, eta, halako kontuak ahoz aho zabaltzen direnez, pazientziaz hartu beharko dugu. Modan daude bizikleta elektrikoak gaur egun, eta geroz eta gehiago erabiltzen direla uste dut".
Gatzebike webgunea
Gatzebike.com webgunea gehiago osatzea eta hedapena ematea da momentu honetan duten erronka nagusia. "Webgunea gertu dago, eta bertan, alokairuan ditugun bizikletak, ibilbide proposamenak, prezioak… ditugu jarrita. Hori horrela, webgunean nabigatu eta bizikleta elektrikoan aritu nahi duena animatu gura dugu bertara etorri eta probatzera. Gainera, jende asko dago halako bizikleta erosi aurretik probatu gura duena, eta horretarako bide ematen du gure zerbitzuak".
Gatzaga saretzeko asmotan
Debagoieneko sarea sortzea ere badela etorkizun laburrean euren erronketako bat adierazi du Gabilondok. Hau da, bailarako komertzioekin, jatetxeekin edota landa-turismoekin elkarlana sustatzea.