Ehiztariek bi lineatako postuak lortu ahal izango dituzte zozketan: lehenengo linean, 88 postu daude –Lete, Apotzaga eta Marin–; eta bigarrenean, berriz, 77 –parke naturala, Alabita, Aranguren–. "Postuen zozketak azaroaren 17ra arte egingo ditugu egunero Aldaype elkartean. Hala, hasi berri, ari da jendea etortzen zozketara, baina oraindik usoak agertzeko goiz da. Edozelan ere, esan beharra dago, urtero moduan, asteburura begira jende gehiago etortzen dela aste barruan baino…", adierazi du Aldaype elkarteko Gerardo Canterak.
Eskoriatzako ehiztariek, bestalde, aurtengo denboraldirako aurreikuspen onak dituzte:
Asier De la Flor, Eskoriatzako ehiztaria:
"Oraindik ehiza denboraldia hasi bakarrik egin da. Oilagor garaia ireki da, birigarroak, usoak antzarrak… pasekoak direnak ehizatu daitezke. Ipar aldetik eta Europa goitik datozenak".
Mikel Arraeta, Eskoriatzako ehiztaria:
"Ehiza postuak eta pistak txuntzen aritu gara, eta orain, Aldaypeko zozketak ditugu egunero. Hasi bakarrik egin gara eta azaroaren 17ra arte izango ditugu zozketak. Pasa den eguenetik hona ez da jende larregi gerturatu, batez ere, egubakoitzetan batzen da jendetza…"
Alex Oiarzabal, Eskoriatzako ehiztaria:
"Zozketara goiz edo berandu joan, ehiztari ona edo txarra izan, edo eskopeta hobea edo txarragoa izan, ez du garrantziarik. Dena izan behar da alde: postua, eguraldia, zortea… hori da klabea, baina gertatzeko zaila, ordea".
Aldayperen batzar orokorra
Honekin batera, irailaren azken asteburuan batzar orokorra egin zuten elkarte kideek, eta presidentea aldatzea izan zen gaietako bat. Hala, hemendik aurrera, Oier Eskibel eskoriatzarra izango da Aldaype elkarteko presidentea.
