Orain arteko edizio guztietan moduan, herriko txoko ezberdin bakoitzean izango da saio bakoitza, eta iazko edizioari jarraituz, hainbat ikuskizun uztaileko asteburuetan zehar banatuta izango dira, eta bakarra, iraileko asteburu batean.
Honakoa da egitaraua:
Travelling Brothers –uztailaren7an, domekan, Fernando Eskoriatza plazan, 19:30ean–, Lau Eme –uztailaren 12an, Gorosarri plazan, 22:30ean–, Eskean Kristo –uztailaren 19an, egubakoitza, Gernika plazan, 22:30ean–, eta Petti –Irailaren 14an, zapatua, Emakumeen plazan, 22:30ean–.
Travelling Brothers
Zuzeneko emanaldi bizi eta ikusgarria eskaintzen duten blues alorreko musikariak dira. Estatuko jaialdi, klub eta areto handi askotan eskaini dituzte emanaldiak eta, baita, Europako herrialde askotan birak eta itzuliak egin dituzte (Frantzia, Italia, Suitza, Alemania, Portugal...). Inoiz alderik alde igaro du ozeanoa AEBetan jotzeko.
Lau eme
Haatik dantza konpainiaren lana da. Kanpotik itxura ederra bazuten ere, sakonean zapalduak eta otzanak ziren garaiko emakumeek emango diote hasiera pieza honi. Familia zaindu eta euren senarrentzat apain egotea zen bete beharreko rola, baina pausuz pausu, eta borroka feministak historian zehar emandako aurrera pausoak erakutsi nahian, gaur egungo emakumearengana iritsiko gara.
Eskean Kristo
Arratiako musika taldea da, 2011an sortutakoa, eta garai bateko rockaren indarra erakustera igoko dira musikariak oholtzara. Rock&roll klasikoa oinarri hartuta, zipriztin psikodelikoak, punk pultsioa, bluesaren kadentzia edota melodia poperoak eskainiko dituzte beraien kantuetan, besteak beste.
Petti
Rock, folk-rock, post-rock, rhythm and blues, country… estiloz bustitako kantuak eskainiko ditu musikari beratarrak. Besteak beste, amerikar sustraiak dituen rocka eskainiko du, Eskoriatzan hainbat aldiz egin izan duen moduan. Hori horrela, bere ahots urratu eta sakonarekin izango da oraingoan ere oholtza gainean.