Aurreskua soka gainean, pailazokeri ugari eta dibertigarriak, bihurrikatze ariketa sinesgaitzak, trapezista abileziak, globoak irensten dituen magoa, malabarista... Txalo zaparrada ugari jaso dituzte gaur eguerdiko emanaldian Gure zirkua ikuskizuneko taldekideek Eskoriatzan. Merezi zituzten. Kalitatezko proposamena egiten dute karpa barruan, eta batez ere gertukoa. Hori da ziurrenik uda osoan eta hamaika herritan izan duten arrakastaren gakoetako bat.
Euskal kantak eta doinuak dira protagonista ikuskizunean, jolas egiten dute hizkuntzarekin eta euskalkien arteko berezitasunek txiste baterako baino gehiagorako ematen dute. Gustura egiten dute esku artean dutena eta transmititu egiten dute. "Eskoriatzan oso publiko atsegina izan dugu", adierazi du emanaldi amaieran Don Martin antzezten duen Joseba Usabiagak. "Herri txikia da, eta nabaritu egiten da publikoak elkar ezagutzen duela. Horrek bereziak egiten ditu emanaldiak".
Eskoriatzako emanaldietarako salgai ipinitako sarrera guztiak agortu dira eta bada kanpoan gelditu den jendea ere. Bi aste barru Gure zirkua Elgetan izango da. Sei emanaldi egingo dituzte bertan eta oraindik ere gelditzen dira hilaren 28rako 21:30ean iragarrita dagoen emanaldirako sarrera ticketea.com atarian.
"Merezi du. Oso lan fina, ona eta landua egiten dute. Zoragarria", adierazi du Zarauztik alabekin etorritako aita batek. "Neskatilek ikusia zuten, baina nik ez. Denok etorri gara gaur. Hau ere bada bertako produktuak kontsumitzea" .
