Atzo, Eta orain, begiratu beste alde batera! hitzaldia izan zen Zaldibar antzokian, eta guztira, 86 guraso izan ziren bertan azalpenak entzuten. Nerabeen artean izaten diren substantzien gehiegizko kontsumoaz hitz egiteko eta kezkak partekatzeko aukera izan zen, eta saioaren helburua gurasoek errealitatea ezagutzea eta guraso bezala zer egin dezaketen jakitea izan zen.
Errealitate hori zein den jakiteko, Aretxabaletako eta Eskoriatzako 12-16 urte bitarteko gazteen ikerketa bat egin da, eta, kontsumoen datuak jasotzeaz gain, beste mota bateko datuak ere jaso dira: gazteen autoestimu maila, asertibitatea, talde presioa eta erabakiak hartzea.
Normalizazioan dago koska
Bertan batu ziren hizlariek hainbat gai aipatu zituzten: gurasoen kontsumoak, gazte lokalak…, eta normalizazioa dela arazo nagusia azpimarratu zuten. "Benetako arazoa da bailaran dagoen drogen pertzepzioa; hau da, kontsumoak guztiz normalizatuak daude, eta hor dago koska. Guraso bezala ezin dugu kontsumo horiek normaltzat hartu".
