Festa eguna izan zen, atzo, Eskoriatzan. Nor bere kinttadakoekin elkartu eta lagun arteko egun pasa polita egiteko aukera. Ideia ez da txarra kinttada bakoitzak festa bere aldetik egin ordez egun bat ipini eta guztiek bat egitea. Esan beharra dago deialdiak gero eta arrakasta handiagoa duela.
Festa bizkor errotu da eta atzokoan ere kinttadetako kide gehienek taldea identifikatzen duen zapia, gorbata edo kamiseta zuten soinean.
Iluntzean dantza saioa
Festa giroan joan zen eguna eta iluntzean plazan elkartu ziren kinttada gehienak. Zabaldua zen herrian txistulariak egongo zirela eta nahi zuten guztiek aurreskua edo banakoa dantza egiteko aukera izango zutela. Ia bat-batean egindako deialdiak arrakasta polita izan zuen, izan ere asko izan ziren dantzara animatu zirenak neska zein mutil, gazte zein nagusi.
Eguenetik aurrera kintoen txanda izango da. Aurten 26 gazte dira eta baserriz baserri ibiliko dira Santa Ageda bezpera egunean. Egubakoitzean, berriz, herriko plazan egingo dute dantzan.
