Sanpedroak 2015 Eskoriatzan

Bero galanta Eskoriatzako haurren danborradan

Atzo, martitzena, haurren danborrada ospatu zuten Eskoriatzan. Alerta laranja tarteko, hasiera ordua 18:00etatik 20:00etara atzeratu zuten antolatzaileek, baina, hala ere, beroa izan zuten danbor-jotzaile txikiek.

Jeneralak, kantinerak, sukaldariak, danbor-jotzaileak… danborradan parte hartu zuten neska-mutil guztiak Eskoriatzako kaleen jaun eta jabe egin ziren atzo arratsaldean, eta garbi utzi zuten emaitza txukuna lortzeko adinak ez duela garrantzirik: ondo jo zuten eta ondo pasatuz, gainera.

Ura, eskutik eskura

Apotzagako bidetik atera eta plazan bukatu zuten emanaldia, ohi baino ibilbide motzagoa eginez. Ohi baino ibilbide motzagoa eta ohi baino beranduago, izan ere, bero alerta zegoela-eta 20:00etan irten ziren 18:00etan beharrean. Bero egiten jarraitzen zuen, ordea, eta ur botilen joan-etorria etengabea izan zen gurasoen eskuetatik txikienetara. Eta ez hori bakarrik, trajeak apur bat tuneatu ere egin zituzten: danbor-jotzaile bat baino gehiago ikusi genuen alkandora askatuta edota tirantedun kamisetarekin.

Halako berotzarra zama izan bazen ere, pozik ibili ziren haur eta gaztetxoak.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.