Hilabete pare bat lanean ibili ostean, prest daukate aurtengo sanpedroetako txosnetako egitaraua. Aurten ere Eingeinkeko kideak, presoen lagunak eta herritar talde bat ibili da txosnetako egitaraua gertatzen. "Ez da baina egitarau soil bat. Gure nahia da gune alternatibo, libre eta dibertigarri bat sortzea. Gune bat non ez diren errespetu faltak onartuko ez eta jarrera xenofobo, homofobo edo matxistarik", azaldu dute Txosna Batzordeko kideek.
Gaineratu dute garrantzitsua iruditzen zaiela "herriko jaietan herritik herriarendako" egindako gune bat egotea, anitza eta adin guztietarako zabalik egongo dena.
Bestalde, nahiz eta hasieratik antolakuntzan taldetxo bat ibili, Txosna Batzordea guztiendako irekia dela azaldu dute eta nahi izanez gero, txosnan lan egiteko aukera ere badagoela: "Inkernu tabernan dagoen txanden taulan izena emateko gonbidapena egiten dugu".
Bigote Egunarekin, jaiei hasiera
Txosnen egitarauan aurten beste urteetan baino egun bat lehenago hasiko dituzte jaiak: Bigote Eguna ospatuko dute egun horretan. Txosnetan photocall-a jarriko dute eta parte hartu nahi dutenek argazkia atera beharko dute bertan. Gauean egingo dute sari banaketa eta sariak horrela sailkatuko dituzte: bigote natural onena, bigote artifizial onena eta Txirotutako Uranioak saria.
Izan Libre Eguna
Hilaren 28an, sexu askatasunaren nazioarteko egunean, Izan Libre Eguna ospatuko dute. Azpimarratu behar da gainera, danborradako presoen aldeko konpartsan 95 lagun irtengo direla koloretako jantziak soinean dituztela. Bikoteen jokua ere egingo dute eta DJ Elvis Cainok girotuko du gaua.
Sanpedro Eguna
Hilaren 29an, fracking-aren aurka sinatzeko aukera egongo da eta DROP! eta Ezinean taldeen kontzertuak egingo dira.
Kuadrilla Eguna
Hilaren 30ean, astelehena, kuadrillen arteko bazkaria egingo dute eta bakoitzak bere jana eraman beharko du. Leku eta edarien txartelak 5 eurotan salduko dira Inkernu eta Aldatz tabernetan.
Horrez gain, Eskoriatzako IV. bandera ere jokoan egongo da egun horretan eta aurten joko berriak egingo dituzte. Parte hartzeko izena eman beharko da hilaren 25a baino lehenago Inkernun, Aldatzen edo Facebooketik mezu bat bidalita.
Gauean, playback txapelketa egingo dute.
Euskal Jai Eguna
Euskal preso eta errefuxiatuen aldeko kalejira egingo da txosnetatik eta piropo lehiaketa ere antolatu dute uztailaren 1eko egunerako.
