Irailerako gura dute inauguratu Eskoriatzako Zaldibar Antzokia

Dagoeneko bost urte inguru pasa dira Eskoriatzako Santa Ana komentuko kapera Zaldibar antzokian egokitzen hasi zirenetik. Atzerapenarekin baina aurrera doaz obrak. Atzo eguerdian azken fasea esleitu zuen Udalak; aurreko biak bezala, Goitu enpresa bergararrak egingo ditu lanok. Irailerako gura dute Zaldibar antzoki berria inauguratzea.

Eskoriatzako Zaldibar antzokiko obrak zelan dauden zuzenean ikusteko aukera izan dugu gaur goizean. Kultura zinegotzi Jose Angel Petralandaren laguntzarekin, eraikinera sartu gara, eta lanak oso aurreratuta daudela ikusi dugu; bigarren fasearekin amaitzeko, lurzorua jartzea baino ez da falta. Eta apirilean hasiko dira azken faseko obrekin.

Goitu enpresa, 229.000 eurotan

Atzo eguerdian bertan esleitu zituzten lan horiek; lehen deialdia hutsik geratu ostean, bigarren bat deitu zuen Udalak, eta bi proposamen jaso dira. Orain arteko lanak egin dituen enpresak egingo ditu oraingoan ere. Hain justu, Goitu enpresa bergararrari esleitu diote proiektua, 229.000 eurotan.

Eserlekuak eta eraikina erabilgarri egoteko gainerako ekipamendua jartzearekin batera, sarrerako atarte bat, guztia kristalezkoa, eta inguruko urbanizazio lanak garatuko dituzte oraingoan. Sarrerako atarte horretan, leihatila kokatuko dute, eta aretora sartu aurreko gunea ere egokituko dute. Lehen solairura igotzeko eskaileretarako sarbidea ere izango da gune hori.

Kanpoko urbanizazioari dagokionez, kalea, kota berdinean geratuko da, Santa Ana auzoko beste gune batzuk bezala, eta zuhaitz eta eserleku batzuk jarriko dituzte inguruan.

Behin zabalik dagoela, askotariko ekintzak egingo dira ekipamendu berri horretan, hala nola, antzerkiak, ikastaroak, kontzertuak edo hitzaldiak. Aprobetxamendua ahalik eta zabalena izan dadin, lehen solairuko eserlekuak kendu ahal izango dira. Horiek gabe, 300 bat lagunendako tokia izango du eraikinak; eta eserlekuak jarrita, berriz, 150 lagun sartuko dira.

Atzerapena

Esan bezala, atzerapen handia dute lanek. Lurzoruarekin, esaterako, arazoak izan dituzte, baina espero dute bizpahiru astetan jarrita izatea.

Zaldibar antzokiak milioi eta erdiko kostua izango du. Udalak milioi inguru jarriko du, eta gainerakoa diru laguntzen bidez ordainduko da.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.