HEMEN DEBAGOIENA

Peiremansen solasaldi musikatua, Elgetako Janela tabernan, Goienakideentzat

Oier Zumarraga Aranburu

Hamar urteren ondoren, Peiremans taldea disko berri batekin eta kontzertu bira oparo batekin itzuli da. Birari ekin aurretik, baina, Gorka Urbizu eta Imanol Ubeda musikariek solasaldi musikatu berezia eskaini zieten Goienakideei. Goienak saio osoa grabatu zuen, eta laster izango da ikusgai.

Peiremans taldeko Gorka Urbizu eta Imanol Ubeda musikariek hitzordu berezia izan zuten Elgetako Janela tabernan, hamar Goienakiderekin. Ohiko agertokietatik kanpo, Amaia Txintxurreta kazetariarekin solasean aritu ziren lehenik, eta sei kantuko kontzertu akustiko goxoa eskaini zuten ondoren. Disko berriko kantuak gertutik ezagutzeko aukera ere izan zuten bertaratutakoek, eta txalo zaparrada batekin agurtu zituzten bi musikariak.

Ekitaldiaren tokiak ere bazuen bere bitxikeria: Gorka Urbizuren bakarkako kantuetako batek Janela bat du izena, eta, hain zuzen, Elgetako Janela tabernan izan zen ekitaldia.

Hamar urteko etenaldia

2005ean sortu zen Peiremans, eta 2016an ekin zion bigarren etapari. Hamar urte geroago, berriro elkartu dira taldekideak, disko berria kaleratzeko eta kontzertu bira bati ekiteko. Itzulerak ikusmin handia piztu du jarraitzaileen artean, eta birako sarrera guztiak agortu dituzte.

Laster, Goienan ikusgai

Janela tabernako saioa osorik grabatu zuen Goienak, eta laster izango da ikusgai. Elkarrizketa eta kontzertu akustikoa jasoko ditu emanaldi intimo zein bereziak.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Batu zaitez Goiena albisteen kanalera.

TELEGRAM: Batu zaitez GoienaAlbisteak kanalera.


Harpidetza aukera guztiak