Elgeta Herri Hezitzailea egitasmoaren baitan sortua, herriko askotariko elkarteek eta eragileek elikatu dute, eta Udala eta Herri Eskola izan dira bultzatzaile nagusiak. "Elgetako berbak, herriaren historia, toponimia –auzoak, mendiak, errekak– eta jolas tradizionalak batzen ditu", azaldu du Hezkuntza zinegotzi Kepa de Vega Izagirrek. "Hiru ikas egoera jaso ditugu eta hainbat baliabide daude umeek Elgetaren inguruan ikas dezaten".
Baliabide horien artean daude mapak, karta-jokoak eta ipuinak. Proiektua aurreko ikasturtean jaio zen, eta orduan abiatu zuten Herri Curriculumaren sortze-prozesua. Herriko ondare materiala zein ez-materiala bildu, antolatu, sailkatu eta umeekin lantzeko forma ematen hasi ziren.
Herri Eskolako klaustroaren inplikazioa zuzena izan da, eta erabiltzen hasi direla esan du Maria Uriarte Artamendi irakasleak: "Herri Curriculum zehatz honekin, Elgetaren inguruan aurretik egiten genuen lanketa hobeto egiteko modua izango dugu".