Bigarren urtez Elgetan hazitako txerri bat izango da Donostiako San Tomas azokako protagonista nagusia. "Ardura da, baina badator eguna eta gogoz nago heldu eta Donostia aldera egiteko", esan du Bilbaok Poxpolin aurkezteko gaur egindako agerraldian. "Orain hamabost bat hilabete bera zen taldeko txerri eme handiena eta azokarako gorde genuen. Lau kilo eta erdi jaten ditu egunero eta hazten jarraitzen du", esan du elgetarrak. Txerri "ona", "lasaia" eta "osasuntsua" dela gaineratu du.
Aukeratutako izenari buruz galdetuta argitu du Donostiako Udalak erabakitzen duela hori. "Aurten Poxpolin da eta izen egokia iruditzen zait txerri baterako".
'Poxpolin'-en aurkezpena gaur
Bilbaok kazetari mugimendu handia izan du gaur txerri-haztegi inguruan. Eguerdi partean sei bat lagun zituen bideo-kamera eta argazki-kamerekin inguruan eta beste hainbaten deiak jaso ditu zuzeneko elkarrizketak egiteko. "Azokarako txerria hazten zuen baserritarrak erretiroa hartu zuen orain bi urte, eta ni izendatu ninduten zeregin honetarako iaz. Egia esan, txerriaren aurkezpenak interesa pizten du", zioen elgetarrak hedabide guztiei txanda nola eman asmatu ezinik.
Basatxerri abeltzain kooperatibako kide da Bilbao eta euskal baserriko txerriak hazten eta eskaintzen ditu abeltzain egin zenetik, orain lau urte. Euskal baserriko txerria nahi izaten dute Donostiako azokan.
San Tomas egunean Donostiara
Bigarren esperientzia izango du Peio Bilbaok Donostiako San Tomas azokan txerriarekin. Hori da abenduaren 21erako duen plan nagusia. "Egun polita izaten da. Goizean han behar dugu 07:00etarako. Lekua prest egoten da eta bertan uzten dugu txerria. Egun osoan inguruan ibiltzen naiz jatekoa eta edatekoa duen ziurtatzeko, baina gainerakoan azokarekin disfrutatzeko aukera ere izaten dut".
Galdera egin diogu: "Esango duzu txerria Elgetan hazitakoa dela, ezta?". Eta erantzuna: "Zalantzarik gabe, behin eta berriz gainera. Hori argi geratuko da".
