Urtebete inguru eman dute Ardo ontzeko lanketan eta serio hartu dute kontua beti ere hain propioa duten umorearekin blaituta. Nola kentzen dira ardo orbanak erropetatik, zergatik gordetzen ditu jendeak botila ardoak urteetan eta urteetan altxorra bailira gehien gehienetan ozpindu egiten denean, zergatik dute ardo gehienek Marques, Conde edo Señorio izena… Eta galderen artean, noski, zer da ardo ona eta zer da ardo txarra?
Erantzun oso pertsonalak dituzte Andoni Tolosak Morauk eta Beñardo Goietxek. Disko-liburuan jaso dituzte. Morau-ren hitzak, Beñardo Goietxeren musika eta Martin Martiarenaren ilustrazioak elkartzen ditu lanak.
Gustura aritu ziren Elgetan Goibeko Euskaltzaleen Topaguneak Ozkarbi elkartearen laguntzarekin antolatutako emanaldian. Bide batez jakin ardoaren inguruko ikerketak martxan jarraitzen duela; izan ere, ez du amaierarik.
