Pediatraren bisita, astean behin bada ere, Elgetan izatea ezinbestekoa ikusten dute sinadura-bilketa egin duten guraso taldeko kideek, eta horretarako erreklamazio formala egin dute. "Egoera da Elgetan ez dagoela pediatrarik. Lehen, astean behin etortzen zen berrikuspenetara edo urgentziazko zitetara, eguenetan, baina, joan egin da. Ordutik, ez dago ordezkapenik", adierazi du Aitor Gantxegi gurasoak.
Jarraipena egitea ezinezkoa
Horren ondorioz, elgetarrak Bergarako osasun etxera jaitsi behar dira pediatria zerbitzua jasotzeko, eta, ez dute beti pediatra berdina, gainera. "Txandakatze sistema edo zerbait dago Bergaran, Osakidetzak ez diguna argitu. Kontua da joaten garen bakoitzean pertsona ezberdin bat dagoela, eta horrek zaildu egiten du gure umeen gaixotasunen jarraipena, haurrak ezagutzea… beti hutsetik hasten garen sentsazioa dugu".
Momentuz ez dute erantzunik jaso, baina, erreklamazioa jarrita, konponbidearen zain daudela adierazi dute sinadura-bilketa egin duten guraso taldeko kideek.