Elgetako udalbatzak abenduaren 22an egindako osoko bilkuran onartu zuen 2021eko udal aurrekontua.
Gipuzkoako Foru Aldundiak egindako aurreikuspenaren arabera, hurrengo ekitaldian 763.642 euro iritsiko dira Elgetara Foru Funtsaren bitartez. "Foru Funtsaren galerak konpentsatzeko 80.000 euroko mailegua eskatuko du Udalak", azaldu du Iraitz Lazkano alkateak.
Pertsonal gastuen ataleko igoeran eragina dute, alde batetik, aurre-erretiro batekin lotutako primaren ordainketak, eta bestalde COVID egoera dela-eta hainbat zerbitzutan errefortzua jartzeko erabakiak –udal brigadan, garbiketa zerbitzuan, ludotekan…–.
Inbertsioetarako %40,33 gutxiago
Inbertsioen atalean 171.639,48 euro aurreikusten dira, aurreko urtean baino %40,33 gutxiago. Oraingoz, Udalak alde batera utziko du San Roke kalean irisgarritasun lanak egiteko proiektua.
Hala, 2021eko inbertsiorik handiena Herri Eskolako haur hezkuntzako jolastokiaren teilatua berritzeko izango da. Kiroldegiko leihoak aldatzea eta Maalako haur parkea estaltzea ere nabarmentzen dira 2021eko egitasmoen artean.
| Haur hezkuntzako teilatua berritzeko | 55.000 |
| Kiroldegiko leihoak aldatzeko | 30.000 |
| Eskola ondoko parkea estaltzeko | 20.000 |
| Udal eraikinetako koadro elektrikoak aldatzeko | 15.597,39 |
| Baserritarren batzordeko inbertsioak | 15.000 |
| Belarra mozteko makina erosteko | 10.000 |
Udalaren zorra
Udalak banketxeekin duen zor bizia Udalaren sarrera arrunten %29 da. Dirutan 453.341 euro dira, eta 2021ean 18.000 euro ordainduko dira.
Kalte-ordainetan dagoen zorra, berriz, 515.491,94 eurokoa da, eta 2021ean 140.743,97 ordainduko dira.
Domingo Iturbe patronatuarekin Udalak duen zorra 127.000 eurokoa da. 2021ean 6.000 euro ordainduko dira.