08:00etan Elgeta herrigunetik abiatuta, Intxorta, Erdella, Santamarinazar, Egoarbitza, eta Azkonabietatik igaro den 25 kilometro inguruko ibilbidea egin dute gaur 120 mendizale inguruk.
Horietako 69k, gainera, finalisten diploma jaso dute ibilbidea bukatzean; 2018an Federazioak antolatzen duen Euskal Herriko iraupen luzeko ibilaldien zirkuituko zortzi ibilbide – eta horietatik bost lurralde ezberdin batean– egin zituztenek, hain zuzen ere. Eta behin gaurko proba bukatu eta arropaz aldatu ostean, Bolatokian elkartu dira horietako asko elkarrekin bazkaltzeko.
Mendian, lagunarte ederrean
Amorebietatik, Gasteiztik, Arrasatetik... Euskal Herriko hainbat txokotatik joandako mendizaleak elkartu dira Elgetan; eta denek ere aipatu dute urtean zehar egiten dituzten iraupen luzeko ibilaldietan, mendiaz bakarrik ez, parte-hartzaileen artean sortzen den giroaz eta lagunarteaz ere asko gozatzen dutela.
Argi utzi dute gainera, mendian ibiltzeko ez dagoela adinik; horren adibide, finalisten artean egon den Amadeo Ezpeleta 82 urteko arrasatearra. Zentzu horretan, Federazioko diruzain Josean Arriolak gazteei egin die dei zirkuituan parte hartzera animatzeko: "Ile zuridun asko ikusten ditugu, baina gazteak faltan igartzen ditugu... Txantxetan esaten dugu koldarrak direla, mendian korrika bakarrik ikusten ditugulako". Eskerrak eman dio gainera Elgetako Udalari gaurko eguna antolatzeko jasotzen duten laguntzagatik.
