Ez da Cainzosek argitaratzen duen lehenengo liburua. Oraingoan, ordea, Elgetako historian oinarritu da eta herriaren sorrera, bilakaera eta ondarea jasotzen ditu bertan. Liburuak Elgetako Udal Artxiboan hasitako txukunketa lanen ondorioz hasi zen forma hartzen. Txema Barrutiaren laguntzarekin orain hiru urte hasi zen zeregin horretan Cainzos eta bertan pilatutako dokumentuetan informazio interesgarri ugari aurkitu dutela dio. Ahaide nagusien arteko borrokak, Konbentzio gerrak, Karlistaldiak, 36ko gerra… Historiako pasarte esanguratsu horiek Elgetan zer nolako eragina izan zuten jasotzen da dokumentu horietan eta liburuan jaso ditu Cainzosek.
Aipamen berezi ugari
Liburuak tarte berezia eskaintzen die herriko baserri sareari, bestelako eraikuntza arkitektonikoei zein ondare artistikoari. Aipamen berezia egiten zaie, baita ere, Elgetan sortutako pertsona esanguratsuenei. Esaterako, Calahorrako inkisidore izandako Martin Saez Ibarrakoa, Olaegitar Otxoa Donor jauntxoa, frantziarren aurkako gerretan ekintza esanguratsuak egindako Maria Angela Telleria edo hurbilagoko historian Domingo Iturbe ongilea, edo Cesareo Eguren Larrañaga administratzailea.
Liburua salgai 20 eurotan
Eguaztenean Elgetako historiaren inguruko aurkezpen laburra egingo du Manolo Cainzosek. Liburuan jasotzen dituenak lehen aldiz plazaratzeko aukera emango dio ekitaldiak. Noski, irekia da eta interesa duten herritar guztiak daude gonbidatuta.