Mirari Larrañaga da Elgetako Udaleko gizarte ongizate batzordeko arduradun berria

Atzo hartu zuen zinegotzi kargua Larrañagak eta lanerako gogoz datorrela esan zuen. Udalbatzak, bestalde, bi adierazpen instituzional onartu zituen atzo egindako osoko bilkuran; bata indarkeria matxistarekin lotutakoa eta bestea Euskararen Egunarekin lotutakoa. Gainerakoan, 2017ko aurrekontua lantzen hasita daude udal ordezkariak. Informazio zehatzagoa eskatu zuen oposizioak. Eskuragarri dutela erantzun zien alkateak.

Atzo hartu zuen Elgetako zinegotzi kargua Mirari Larrañaga Zialtzetak. Agurtzane Alkaldek EH Bildu udal taldean utzitako hutsunea betetzera dator, eta gizarte ongizate batzordeko buru izango da aurrerantzean. Elgetako eguneko zentroko langilea da Larrañaga eta gertutik ezagutzen du egokitu zaion arloa. Egindako lanagatik esker oneko hitzak izan zituen Larrañagak Alkalderendako. Azaldu du ilusioz hartzen duela ardura berria, eta agindu du onena ematen saiatuko dela. "Ahalegina behintzat ez da egin barik geldituko", esan zuen.

Izendapen berria egin ostean udalbatzak aho batez eman zion oniritzia Gipuzkoako Ur Kontsortzioaren estatutua aldatzeko proposamenari. 2013an onartutako lege batek eskatzen duen tramite legala da.

Horrekin batera bi adierazpen instituzional onartu zituzten atzo Elgetako udal ordezkariek. Bata indarkeria matxistarekin lotuta. Esparru horretan hainbat konpromiso hartu ditu Udalak, besteak beste berdintasun esparruko politikak bultzatzea.

Ate joka dagoen Euskararen Nazioarteko Egunarekin lotuta ere adierazpen instituzionala onartu du udalbatzak aho batez.

Galdera erreguen txandan oposizioak informazio zehatzagoa eskatu zuen 2017ko aurrekontuaren lanketarako. Iraitz Lazkano alkatearen erantzuna izan zen informazio hori eskuragarri dagoela.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.