Adrian Conde argentinarrak emango dio hasiera aurtengo edizioari, Piccolo Camerino ikuskizunarekin; magia eta antzerkia uztartzen dituen ikuskizuna da, adin tarte ezberdinetako jendeari zuzenduta. Eta Conde bera arduratuko da hurrengo egunean egingo den aurtengo edizioko jaialdi izarra aurkezteaz. Lau artistak parte hartuko dute, oso aukeratuak eta sarituak laurak: Nuel Galan balentziarrak manipulazio magia egingo du; Madrilgo Los Taps bikoteak, komedia magikoa; Bartzelonako Mag Marinek, Grandes Ilusiones ikuskizuna; eta Lautaro madrildarrak, klasiko bat: usoekin egindako magia. Horiez gain, zapatu arratsaldean eta domeka goizean umeentzako magia tailerrak izango dira, eta domeka eguerdian magia tabernetan zehar ere izango da.
Oxel Erostarbe alkateak ziurtzat jo du aurtengo edizioak ere jende asko eramango duela Elgetara, kalitatezko magiaz eta ilusionismoaz gozatzeko erreferentziazko leku bihurtu delako Elgeta, bere esanetan.
Sarrerak salgai daude gaurtik bertatik, hiru puntutan:
- Elgetako Espaloia kafe antzokia.
- Pikupe Produkzioen Bergarako bulegoa (Artekalea, 7).
- www.pikupe.com.