Ekogunek hamaika Baratze Parke ditu Gipuzkoan. Asmoa da Elgetakoa, hamabigarrena, maiatzerako martxan egotea. Astelehenean aurkeztu zuten ekimena Ekoguneko ordezkari Amalia Britosek, Kimu Bat enpresako Mitxel Igarataundik, eta Elgetako alkate Oxel Erostarbek. "Aste Santu ostean hasiko ditugu lanak, eta asmoa da maiatz hasieran ortuak prest egotea", esan du Oxel Erostarbe alkateak.
Baratze zaintza ekologikoa
Elgetako Baratze Parkean zaintza ekologikoa egin beharko da, eta nork bere kontsumorako. 50 metro koadroko 30 lursail eskaintzen ditu Udalak. Bost urterako esleipena izango da, eta urteko kuota ehun euro ingurukoa. Elkarte bat sortu beharko dute baratzezainek, eta Udalak adostutako arautegi batean jasoko dira horien eskubideak eta betebeharrak.
Formazioa eta aholkularitza
Baratzezain berriek bost bat orduko ikastaroa jasoko dute hasieran, eta Kimu Bat enpresaren aholkularitza izango dute, gutxienez, urtebetean. "Oso lur sail polita da. Bertako lurra da, lehen baratze izandakoa eta egutera: eguzkiak goizetik iluntzera arte jotzen du", esan du Kimu Bat enpresako ordezkari Mitxel Igarataundik.