Domu Santu Eguna da gaurkoa, hildako senide eta lagunak oroitzeko eguna. Debagoienean, beste leku askotan bezala, goizean goizetik hurbildu da jendea hilerrietara, loreak eskaintzera. Hala ere, hainbatek aurretik hilobiak apainduta utzi dituzte; egun bat edo bi lehenago hilerrira etortzea ere aukera bat bihurtu delako.
Jendea hurbildu ahala kanposantuak erakusleiho eder bihurtzen joaten dira. Norberaren loreak eskaintzearekin batera, beste hilobiak nola gelditu diren ikustea izaten da askorendako goiz pasa; egunak duen oroimen izaera ahaztu gabe.
Jende ugari
Aurten, Oñatin izan da GOIENA, jende ugari izan da bertan. Asko herrikoak izan dira, baina kanpotik etorritako jendearen emaria ere esanguratsua izan da. "Ez naiz hemen bizi, baina nire gurasoak hemen ditudanez urtero etortzen naiz bisita egitera", esan du herritar batek. Hala, hilerriko urteroko bisita, familian elkartu eta lore-sorta dagokion hilerrira eramateko aitzakia izaten da askorendako. Beste batzuek, aldiz, maiz egiten dute hilerrira bisita: "Oñatiko hilerriaren kokapenak lagundu egiten du; leku garbi eta polita da, eta bertatik paseoa egiten dudanean sartzen ohi naiz nola dagoen ikustera". Bakoitzak bere modura egiten du, baina hildakoak gogoan dituzte guztiek.
Oñatikoa bakarrik ez, Debagoiena osoko hilerriak lorez apainduta gelditu dira. Gaurko egunez, elizkizunak ere izan dira, eta hilerriak zabalik egongo dira iluntzera arte.
