Hona hemen herririk herri zehaztutako egitaraua:
Arrasate
10:00etatik 12:00etara bitartean izango da auzolana. Bi elkargune zehaztu dituzte: Musakolako San Isidro plaza eta San Andresko Maiatzaren Bata plaza. Asmoa da, 10:00etan elkartzea ibaian sartzeko, eta behin lanak bukatuta, 12:30ean, aipatutako bi plazetan jarritako mokadutxoarekin bukatzea.
Bergara
Bi elkargune zehaztu dituzte: Seminarioko patioan eta Osintxuko plaza. Eta 09:00etatik 13:00etara bitartean egingo dute garbiketa. Ondoren, mokadutxoa izango dute parte-hartzaileek.
Bestetik, hurrengo egunerako, domekarako beste ekintza bat antoloatu dute Kukubaso elkartearekin batera: Mekolaldeko araztegira bisita. Hara joateko Agorrosinen elkartuko dira 10:00etan edo 11:00etan agertu behar da Mekolalden. Aldez aurretik izena eman behar da.
Oñati
10:00etan elkartuko dira Foruen plazan eta batutako pertsona kopurua kontuan hartuta erabakiko dute zenbat talde egin eta nora joan garbiketa egitera.
Aretxabaleta
10:00etan elkartuko dira Herriko Plazan eta taldetan banatuta gune ezberdinetara joango dira; asmoa da Errotabarrin hasi eta Arbizelairaino garbitzea. Behin bukatuta, 12:30ak-13:00ak bueltan mokadutxoa izango dute plazan. Zakarrak jasotzeko edukiontziak ere han jarriko dira herritarrek ikus dezaten zer eta zenbat batu den.
Eskoriatza
10:00etan batuko dira Fernando Eskoriatza plazan eta jende kopuruaren arabera, taldetan banatuko dira. Dena den, seguruenik talde bakarra izango da eta Santa Marinatik jaitsiko dira ibaira; jende asko batuz gero bigarren talde bat unibertsitate ingurutik jaitsiko da Debara. 13:00etan bildutakoarekin argazkia aterako dute.
Elgeta
Deba ibaia ez denez Elgetatik pasatzen aurreko bi urteetan Aixola erreka garbitu dute. Aurten Asentzio ingurua da auzolanean garbituko dutena. Taldea 11:00etan elkartuko da plazan eta oinez egingo dute Asentziorako bidea. 14:00ak arte garbituko dute Asentzio aisialdi-gunea eta amaitutakoan luntxa egongo da.
Aramaio
09:30ean elkartuko dira plazan Mendixol elkarteak deituta.
Leintz Gatzaga
11:00etan elkartuko dira plazan eta Gatz museotik hasita, ibaian gora joango dira garbitzera.
