Ikus-entzunezkoan jaso dira XIX. mendeko Gerra Karlistak, liberalen garaipenaren ondoriozko foruen abolizioa, eta handik 100 urtera sortu zen Alkateen Mugimendua, tokiko ikuspuntu batetik.
Ikus-entzunezkoak ahotsa emango die historialariei, Alkateen Mugimenduko kideei eta gaur egungo euskal politikariei, euskal foruak galtzearen arrazoien eta gerora etorri diren ondorio politikoen berri eman dezaten.
Goiena.eus-en ere ikusgai egongo da ostegunetik aurrera Burujabetza iparrorratz ikus-entzunezkoa. Gainera, ostiral honetako Puntua aldizkariko erreportaje nagusia ere bi mugarri horietatik abiatuko da. Izan ere, uztailaren 21ean beteko dira 150 urte foruen aboliziotik eta 50 urte Alkateen Mugimenduaren sorreratik.
Hilaren 19an oroituko dituzte bi mugarriak
Bergarako Udalak eta Gipuzkoako Foru Aldundiak ekitaldi politiko-instituzionala egingo dute Bergarako Usondo parkean uztailaren 19an, domeka, eguerdiko hamabietan. Autogobernua eraikitzen, erakunde propioak defendatzen eta euskararen biziberritzean urratsak ematen jarraitzeko konpromisoa berretsiko dute 200 herri-ordezkarik baino gehiagok.
Bergarako Udala eta Gipuzkoako Foru Aldundia elkarlanean ari dira antolatzen eta hitzordu garrantzitsua dela aipatu dute: "Zeinak karga sinboliko handia izango duen, iragana, oraina eta etorkizuna lotuz hitzen, musikaren eta dantzaren bitartez". Ekitaldi politiko-instituzionean Alkateen Mugimendua gogoratu eta 1976ko udal ordezkarien ekarpena aitortuko dute. Ekitaldia, halaber, etorkizunari begirako konpromisoak partekatzeko eta "Euskal Herriaren eskubide historikoen inguruko eztabaida berritzeko" topagune izango da.