Aste honetan bi eguneko jardunaldi bereziak egin dituzte elkarlanean UNED Bergarak eta Oñatin dagoen Gipuzkoako Artxibo Historikoak. Bereziki nabarmendu dute XVI. mendean Oñatin unibertsitate bat sortu izanak izan zuen pisua. Debagoiena ikerketa eta pentsamenduaren gune garrantzitsua izan da Errenazimentutik gaur egunera arte. Garai hartako Salamancako edo Alcaláko unibertsitate handiekin alderatuta bazterrean egon zitekeela dirudien arren, eskualdea hainbat eskola eta elkarte zientifikoren sorleku izan zen, eta horiek eragin handia izan zuten lurraldearen garapenean.
Erakusketa, hilaren 18ra arte
Jardunaldiak amaitu diren arren, ekimenaren barruan antolatutako erakusketa oraindik ikusgai dago Oñatiko Gipuzkoako Artxibo Historikoan, hilaren 18ra arte. Bertan, artxiboan gordetzen diren dokumentu eta lan bibliografikoen bidez, jakintzaren eta zientziaren irudikapenak erakusten dituzte.
Erakusketak bereziki erreparatzen dio Sancti Spiritus Unibertsitatearen arkitekturan ageri diren sinboloei. Herkulesen lanen irudikapenak eta bertute klasikoak —zuhurtzia edo itxaropena, besteak beste— jakintzaren bilaketarekin lotuta agertzen dira. Antolatzaileen arabera, elementu horiek garaiko pentsamoldea eta zientziaren garrantzia ulertzeko giltza dira.Gainera, erakusketan dauden liburu batzuen eta gaur egun Alemanian egiten ari diren ikerketa proiektuen arteko loturak ere identifikatu dituzte, eta horrek agerian uzten du Oñatiko ondareak nazioarteko ikerketarekin duen harremana.
Erakusketan dauden liburu batzuen eta gaur egun Alemanian egiten ari diren ikerketa proiektuen arteko loturak identifikatu dituzte
Europa osoko adituak hitzaldi-zikloan
Jardunaldien barruan hitzaldi-ziklo bat ere egin zuten eguaztenean, eta Europa osoko irakasle eta ikertzaileak batu ziren Bergaran. Besteak beste, Rosa Ayerbe EHUko Instituzioen Historiako irakaslea; José Antonio Azpiazu, Mondragon Unibertsitateko irakasle ohia eta XVI. mendeko euskal gizarteari buruzko ikerlaria; José Ramon Carriazo, UNEDeko irakaslea eta Errenazimentuko testuetan aditua; Daniel Di Liscia, Municheko Unibertsitateko ikertzailea; eta Francisco Díaz Marcilla, Almeriako Unibertsitateko irakaslea. Adituek Debagoieneko jakintza-tradizioa, Erdi Aroko eta Errenazimentuko testuak eta liburutegien historia izan zituzten hizpide, besteak beste.