Martxoaren 17an egingo den grebarako dei egin du gaur ELAk, Arrasateko Maiatzaren Lehena plazan.
"2008ko krisialdia langile klasearen bizkarretan jarri zuten, eta ordutik aberastasunaren banaketa gero eta modu bidegabeagoan egiten ari da. Gainera, krisiak biderkatu egin dira; krisi ekologikoa, zaintzarena, soziala, ekonomikoa, politikoa eta eskuin muturraren oldartzea. Etxebizitza eta oinarrizko produktuen prezioen gorakada ere eman da, eta horrek, prekarizatu eta pobretu egiten gaitu", salatu du ELA sindikatuak Arrasaten.
Euskal Herriko hiriburuetan deituriko manifestazioez gain, Eibarren elkarretaratzea egiteko deia egin du Deba bailarako ELAk. Manifestazioa 12:30ean egingo dute Untzaga plazatik hasita. Ondoren, arratsaldean, herri bakoitzeko greba batzordeek antolatutako manifestazioak egingo dira herrian bertan.
"Lanaren truke langile klaseak jasotzen duen soldata, lanean gogor jardun arren, ez da nahikoa bizitzaren garestitzeari aurre egiteko eta bizitza duin bat eramateko. 1.500 euroko gutxieneko soldatak egoera horri frenoa jartzen lagunduko liguke", aipatu du Deba eskualdeko ELAko koordinatzaile Eneritz Aristondok.
Gainera, datorren asteko asteartean, martxoaren 3an, Deba eskualdeko ordezkari guztien batzar orokorra egingo du ELAk, Bergarako Seminarixoan.