V16 baliza da errepidean arriskua seinaleztatzeko baimendutako gailu bakarra, aurtengo urte hasieratik, eta larrialdietako triangeluak ordezkatuko ditu. Gidariak errepidera atera behar izatea saihestea eta segurtasuna handitzea ditu helburu. Hori bai, txaleko islatzaileak ibilgailu barruan eraman beharreko nahitaezko elementua izaten jarraitzen du, edozein arrazoi tarteko irten behar izanda ere.
Gailu homologatuen zerrenda
Derrigortasuna tarteko, halako gailuak saltzen dituzten tokietan areagotu egin da mugimendua. Eskoriatzako Aingeru gasolindegian, adibidez, ekarritako guztiak saldu dituzte eta barik daude uneotan. Jakin izatera gehiago ere ekarriko zituztela adierazi dute, asko eskatzen direlako oraindik.
Balizarik ez izateak, istripu kasu batean, erantzukizuna norberak hartu behar izatea ekarri dezake. Eta balio ez duen gailu bat aukeratzea ekiditeko modurik seguruena, berriz, Trafiko Zuzendaritza Nagusiaren webgunean gailu homologatuen zerrenda ofiziala kontsultatzea da.
Intentsitate handiko argi keinukari baten bidez, gailu berriak ibilgailu bat geldi dagoela ohartaraziko die beste gidariei, ibilgailua non dagoen jakinaraziko die dagokien Trafikoa Kudeatzeko Zentroei, eta kokapenari buruzko informazioa denbora errealean emango du errepideko mezu aldakorreko paneletan eta gainerako ibilgailuetako nabigatzaileetan.