Dagoeneko 25 urte pasa dira Goiena Komunikazio Taldearen sorreratik, eta urte horietan guztietan ibilbidean lagun izan dituzten kontsumitzaileak, kolaboratzaileak, bezero komertzialak eta, orokorrean, Goienaren komunitateko kideak direnak eta izan direnak eskertu nahi ditu Goienak. Astelehenean, abenduaren 1ean, Bergarako Seminarixoan 18:30ean egingo dute horretarako ekitaldi nagusia –gonbidatuei 18:00 ingururako joateko eskatu zaie–.
Urteurrenaren ospakizunak abenduaren 1eko data sinbolikoa ekartzen du gogora: orain dela 25 urte, abenduaren 1ean, kaleratu zen lehenengo Goienkaria.
450 lagun inguru espero dira ekitaldian, eta, mokadutxo batekin, ondo ospatzen borobildu nahi du Goienak gertukoekin urteurren berezia. Bertan emango da lehendabizikoz komunikazio taldearendako 25 urte hauek izan direna jasotzen duen spota; behin estreinatuta, Goienaren gainontzeko euskarrietan ikusi ahal izango dute herritar guztiek.
Taldeak urteurrena aprobetxatuko du Goienaren irudi korporatibo berria estreinatzeko, eta egun horretan bertan, GOIENA aldizkariaren zenbaki berezi bat argitaratuko da. Gainera, Puntua aldizkaria jasotzen duten Goienakide guztiek datorren urteko egutegia ere jasoko dute euren etxeetan, abenduaren 5ean. Horrez gain, Goiena.com webgune korporatiboa ere berritu dute. Bertan, besteak beste, aukera dago Goiena barrutik ezagutzeko bisita gidatuak erreserbatzeko. Hala, Goienaren ateak herritar guztiei zabaldu nahi dizkiete, bertan egiten den lana gertuagotik ezagutu ahal izateko eta instalazioak bertatik bertara ikusteko.
Euskara hutsezko tokiko proiektu komunikatiboa da Goiena. 60 pertsonako lantaldea du –horietako 40 lan bazkideak–. Aurrekontua 3,3 milioi eurokoa da, eta zazpi hedabide kudeatzen ditu. GOIENA aldizkariak 23.000 irakurle ditu astero, Goiena.eus webguneak 9.000 erabiltzaile egunero eta telebistak 5.000 ikusle egunero. Gainera, Tokikomeko 78 komunikabideetako bat da.