Energia bulegoak martxan daude Debagoieneko herri guztietan, herritarrei laguntzea eta zalantzak argitze helburu izanda. Izan ere, energiarekin lotuta ezagutza falta dagoela jabetu da Debagoieneko Mankomunitatea eta informazio erabilgarria herriz herri ematen ari da jasangarritasunaren eskutik. Honela "Ikusi duguna da energiaren gaiarekin lotuta, ezezagutza bat badagoela, eta, oinarrizko zerbitzu bat den heinean, energia eta gasa etxe guztietan dugun horretan, garrantzitsua ikusi dugu bulego baten bitartez, fakturen irakurketak azaldu, eta, energiaren inguruko beste azalpen batzuk emateko ere bulego bat izatea", adierazi du Xabier Igartuak, Debagoieneko mankomunitateko lehendakariordeak.
Zerbitzu ibiltaria
Zerbitzua doakoa eta ibiltaria da, eta horretarako kanal ezberdinak daude eskuragarri [Hemen webgunea]. Aurrez aurreko arreta, asteko egun bakoitzean herri batean izaten da toki eta ordutegi jakin batean.
-
Aurrez aurreko arreta, tokiak eta ordutegiak:
| Ordutegia | Helbidea | Herria |
|---|---|---|
| Astelehena 9:00-14:00 | Fernando Eskoriatza plaza 1 (Udaletxea) | Eskoriatza |
| Asteartea 9:00-13:00 | Nafarroa etorbidea 17, behea (Mankomunitatea) | Arrasate |
| Asteartea 14:30-17:30 | Durana kalea 13 | Aretxabaleta |
| Asteazkena 9:00-14:00 | Bidebarrieta 24, behea | Oñati |
| Osteguna 9:00-13:00 | Mendizaleen plaza, 1 (Udaletxea) | Elgeta |
| Osteguna 14:30-17:30 | San Martin plaza z/g (Udaletxea) | Bergara |
| Ostirala 9:00-14:00 | Herriko Plaza 8 (Udaletxea) | Antzuola |
*Leintz Gatzagan ere zerbitzua aurrez aurre emateko aukera egongo da, baina aldez aurretik hitzordua eskatu beharko da.
Berdina kontsumitu arren, gehiago ordaintzen
"Gasaren kasuan, adibidez, ikusi dugu fakturatik-fakturetara aldaketa handiak daudela. Suertatu daiteke herritar bat beste baten alean, hirukoitza ordaintzen egotea, berdina kontsumitzen. Beraz, herritar bakoitzaren egoera ikusteak merezi du, eta herritarrari gutxienez azalpenak ematea. Gero, herritarra bera izango da erabakia hartuko duena, baina, instituzioetatik gardentasun hori bultzatzea garrantzitsua dela uste dugu", nabarmendu du Igartuak.
Herritarrei eskaera
Era berean, Energia bulegotik gogorarazi nahi dute, orokorrean, neguan energiaren prezioek gora egiten dutela, eta komenigarria dela elektrizitate eta gasaren kontratuen inguruko informazio eguneratua izatea. "Bereziki komeni da jakitea zein motatako kontratua daukan bakoitzak". Hala, aurrez neurriak hartzeko eskatzen diete herritarrei.