Aurreikusitakoa baino ia hogei egun beranduago, baina hemen dira Oporrak Bakean egitasmotik aurten EAEra uda pasatzera etorri diren 213 haur sahararrak. Horietatik zazpi etorri dira bailarara; bost Oñatira eta bana Bergarara eta Aretxabaletara.
Hemengo aisialdiaz aparte, haur sahararrendako garrantzitsua izaten da beharrezko osasun azterketak egitea, eta lehen egunak horretarako aprobetxatu dituzte.
Abuztuaren bukaerara arte izango dira hemen haur sahararrak, eta bizi diren desertuko 50 graduetatik urrunduta, euren osasuna indartu ahal izango dute. Gainera, euren errealitatea ezagutarazteko ere balioko duela diote familiek, izan ere, diote herritar asko gerturatzen zaizkiela galdezka.
Txernobilgoak ere bai
Haur sahararrez gain, Txernobiletik ere etorri dira umeak Debagoienera. Aurten lau etorri dira Bergarara eta bi Eskoriatzara. Horiek ere harrera familietan igaroko dute uda.